ഒരു രോമവും കുറെ രോമന്മാരും....!!!

മഞ്ഞും  മഴയും  ആര്‍മാദിച്ചു പെയ്തിറങ്ങുന്ന മലയാള മണ്ണില്‍ വിവരത്തിനും വിവേകത്തിനും കുറച്ചു പഞ്ഞമാണെങ്കിലും വിവാദത്തിനും അപവാദത്തിനും ആരോപണത്തിനും യാതൊരുവിധ ക്ഷാമവും ഇല്ല.

ഇനിയഥവാ അങ്ങനെയൊരു ക്ഷാമം നേരിടുകയാണെങ്കില്‍തന്നെ പടച്ചോന്റെ ഖുദ്റത്ത് കൊണ്ട് ഞമ്മളെ മാധ്യമങ്ങളും മതമേലദ്ധ്യക്ഷരും  രാഷ്ട്രീയ നേതാക്കളുമടക്കം  അതിനൊരു പരിഹാരവുമായി മുന്നോട്ടു വന്ന്  മതവിശ്വാസികളുടെയും പൊതുജനങ്ങളുടെയും ക്ഷാമം തീര്‍ക്കുന്നത് കാണുമ്പോള്‍ ഉള്ളത് പറയാലോ ഈയുള്ളവന്  പൊതുവെ രോമം കുറച്ചു കുറവാണെങ്കിലും  ഉള്ളസ്ഥലത്തെ രോമം ഒരു മടിയും കൂടാതെ എഴുന്നേറ്റു പോവുകയാണ്.



വര്‍ത്തമാന  കേരളം കൂലങ്കൂഷിതമായി ചര്‍ച്ച ചെയ്യുന്ന കാര്യവും ഒരു മുടിയാണ്.  "മുടി ഒറിജിനല്‍ ആണോ അല്ലേ" എന്നതാണ് വലിയ പ്രശ്നം.  ഒരു കൂട്ടര്‍  പറയുന്നു  ഇത് ഒറിജിനല്‍ ആണെന്ന്, മറ്റൊരുപാട് വിഭാഗങ്ങള്‍  പറയുന്നു...  ഇത് ഒറിജിനല്‍ അല്ല/  ആണെങ്കില്‍ തെളിവ് കൊണ്ടുവരണം /കൈമാറി വന്ന പരമ്പര കാണിക്കണം/ ഉറവിടം വ്യക്തമാക്കണം തുടങ്ങി അങ്ങോട്ടും ഇങ്ങോട്ടും പരസ്പരം  തെറിയും പൂരപ്പാട്ടും ആരോപണ പ്രത്യാരോപണങ്ങളും കൊടുമ്പിരികൊണ്ടിരിക്കുമ്പോള്‍  ആണ്  കമ്മ്യൂണിസ്റ്റ്  ബൂര്‍ഷ്വാസി  സാക്ഷാല്‍  പിണറായി വിജയനും ഈ മുടിയില്‍ ഒന്ന് തൊട്ടു നോക്കിയത്.  പണ്ട് മടിയില്‍ കിടത്തിയവന്റെ  കയ്യിലുള്ള മുടിയാണിതെന്നു തിരിച്ചരിഞ്ഞാണോ  അല്ലാതെയാണോ  സഖാവ് ഈ രോമത്തില്‍  സ്പര്‍ശിച്ചതെന്ന് കാറല്‍ മാക്സ് പുണ്ണ്യളനും ലെനിസ്റ്റ് ദേവന്‍മാര്‍ക്കും മാത്രമേ അറിയൂ .

സഖാവും സഖാവിന്റെ രോമവും അവിടെ നില്കട്ടെ ......!

എന്‍റെ വിശ്വാസ പ്രകാരം,  അന്ധകാരത്തില്‍ ജീവിച്ച ഒരു ജനതയെ നേരായ രീതിയില്‍ ജീവിക്കാന്‍ പഠിപ്പിക്കാന്‍  പിറന്നുവീണ/ പെണ്‍കുഞ്ഞിനെ ജീവനോടെ കുഴിച്ചുമൂടുന്ന ആചാരത്തെ ഇല്ലാതാക്കാന്‍/ മനുഷ്യന്‍ മനുഷ്യന്റെ അടിമയല്ല ദൈവത്തിന്റെ ദാസന്മാരാണെന്നു ലോകജനതയുടെ മുന്‍പില്‍ മനസ്സിലാക്കി കൊടുക്കാന്‍  ഉടയതമ്പുരാന്‍ അയച്ച തിരുദൂതരുടെ  മുടിയാണ് ഇന്നൊരു വിഭാഗം മുസ്ലിങ്ങളുടെ ഇടയിലെ നീറുന്ന  പ്രശ്നം.

ചര്‍ച്ച ചെയ്തിട്ടും  വാദപ്രതിവാദങ്ങള്‍ നടത്തിയിട്ടും അന്വേഷിച്ചിട്ടും  പരിഹാരമാവാത്ത പ്രശ്നം  ഇതാണോ ? ഇന്നത്തെ മുസ്ലിമിന്റെ യഥാര്‍ത്ഥ പ്രശ്നം ഇതാണോ ?ഇന്ന് ലോക ജനതയുടെ പ്രശ്നം  മതത്തിന്റെ വാക്താക്കള്‍ എന്നുപറഞ്ഞു വെളുവെളുത്ത വസ്ത്രങ്ങളും അണിഞ്ഞു കറുകറുത്ത ഖല്ബുമായി  ഈ സമുദായത്തിനെ പറയിപ്പിക്കാന്‍ ആട്ടിന്‍തോലിട്ട ചെന്നായ്ക്കളായ ചില മതപുരോഹിതന്മാര്‍ ഇറങ്ങി തിരിച്ചിരിക്കുന്നത്.  ഇതിനായി ഈ  ക്ണാപ്പന്മാര്‍  കൂട്ട് പിടിച്ചതോ  ആത്മീയതയെയും..!

യഥാര്‍ത്ഥ ആത്മീയതയുടെ പ്രചാരകരാണ് നിങ്ങളെങ്കില്‍,  പ്രചരിപ്പിക്കേണ്ടതും എതിര്‍ക്കേണ്ടതും മുടിയേയും മുഹയുദ്ധീന്‍ ശൈഖിനേയും ഒന്നുമല്ല.  മറിച്ച് ഏതൊരു അനാചാരത്തേയും  ഏതൊരു അരാജകകത്തേയും  ചെറുക്കാനാണോ തിരുദൂതര്‍ ഈ ഭൂമിയില്‍ അവതരിച്ചത് അതൊക്കെയും ഇന്ന് ഭൂമിയില്‍ തിരിച്ചു വന്നു കൊണ്ടിരിക്കുകയാണ്.  എന്തേ നിങ്ങളുടെ ആത്മീയതയുടെ നാക്ക് അതിനെതിരെ പ്രബോധനം നടത്താത്തത്..?   നിങ്ങള്‍ കോടികളുടെ ആരാധനാലയം പണിയാന്‍ പോകുമ്പോള്‍  നിങ്ങളുടെ പരിസരത്തെ തന്നെ മനുഷ്യര്‍ കേറികിടക്കാന്‍ കൂരയില്ലാതെ/  പണമില്ലാത്തതിന്റെ പേരില്‍ പ്രായം തികഞ്ഞ പെണ്‍കുട്ടികളെ കെട്ടിച്ചയക്കാനാകാതെ/ പശിയടക്കാനായി വട്ടിപ്പലിശക്കാരന്റെ കോന്തലയില്‍ തൂങ്ങി ശ്വാസത്തിന്  പോലും  വിലകൊടുത്തു ജീവിക്കുന്ന  ആയിരങ്ങളുണ്ടാകുമ്പോള്‍ പലിശക്കെതിരെ കാംപൈന്‍ നടത്തി പണപ്പിരിവ് നടത്തുന്ന നിങ്ങളുടെ ആത്മീയത ഇതെന്തേ കാണാതെ പോകുന്നു ..? നിങ്ങളാണോ മതത്തിന്‍റെ വാക്താക്കാള്‍..!!  "ഒരുവാക്ക് കൊണ്ടുപോലും നിന്‍റെ സഹോദരനെ വേദനിപ്പിക്കല്ലേ" എന്ന് പഠിപ്പിച്ച പ്രവാചകനെ സ്നേഹിക്കുന്നവര്‍ നാഴികക്ക് നാല്പതുവട്ടം നാട്ടിലുടനീളം മൈക്ക്കെട്ടി നാട്ടുകാര്‍ക്ക് അലോസരമാകുന്ന വിധം സ്വസമുദായത്തെ തെറി വിളിക്കുന്ന നിങ്ങളാണോ  പ്രബോധനത്തിന്‍റെ  ഹോള്‍ സൈല്‍ ഡീലര്‍മാര്‍..?  പരസ്പരം ചളിവാരിയെറിയലും വിഴുപ്പലക്കലും അടക്കം സമുദായത്തെ പറയിപ്പിക്കുന്ന സകല തെമ്മാടിത്തരങ്ങളും ചെയ്യുന്ന പൌരോഹത്യ വര്‍ഗമേ  നിങ്ങളെ വിശ്വാസികള്‍ തിരിച്ചറിയുന്ന കാലം വിദൂരമല്ല എന്ന് നിങ്ങള്‍ മനസിലാക്കിക്കോ...


ഇന്ന് നിങ്ങളെല്ലാംകൂടി  ഈ സമുദായത്തെ എവിടെ കൊണ്ടെത്തിച്ചുവെന്ന്  നിങ്ങള്‍ മനസ്സിലാക്കി യിട്ടുണ്ടോ..?  ഇല്ലെങ്കില്‍, കുറച്ചു ആത്മനൊമ്പരത്തോട് കൂടി വിനീതന്‍ ഒരു നിസാര കാര്യം പറയട്ടെ.....  ഇന്ന് നിങ്ങളുടെ പ്രധാന സ്റ്റണ്ട് നടക്കുന്നത് യൂ ടൂബിലാണല്ലോ, ആ ടൂബില്‍  'തെറി' എന്ന് ടൈപ്പ് ചെയ്‌താല്‍  വരുന്ന സേര്‍ച്ച്‌ റിസള്‍ട്ട് നിങ്ങളുടെയൊക്കെ ആത്മീയ പ്രഭാഷണങ്ങളാണ്.  അത്കൊണ്ട് നിങ്ങളോട് എനിക്ക് ഒന്നേ പറയാനോള്ളൂ..ആരാന്‍റെ ചോറും തിന്നു അള്ളാന്റെ ഇല്മും വാങ്ങി കൂത്താടരുത്/.


ഇനി തിരുകേശവും പിണറായി വിജയനും

ഈ തിരുകേശ വിവാദം മുസ്ലിം സംഘടനകള്‍ക്കുള്ളില്‍ തന്നെ  വെച്ച് തീര്‍ക്കണമായിരുന്നു. എതിര്‍കക്ഷികള്‍ ഉന്നയിച്ച തെളിവ് നല്‍കണമായിരുന്നു. അതല്ലാതെ അരിയെത്ര എന്ന് ചോദിച്ചപ്പോള്‍ പയറഞായി എന്ന് പറഞ്ഞപോലെ 'കേരള യാത്ര' നടത്തുകയല്ല വേണ്ടിയിരുന്നത്.  അടുക്കളയില്‍ തീര്‍ക്കേണ്ട വിഷയം അരങ്ങത്തേക്ക് എത്തിച്ചാല്‍ പിണറായി വിജയന്‍ അല്ല സാക്ഷാല്‍ പ്രവീണ്‍ തൊഗാഡിയ പ്രതികരിച്ചാല്‍പോലും അതില്‍  അത്ഭുതപ്പെടാനില്ല. അതിന്‍റെ പേരില്‍ വിവേകമുള്ള ഒരു മുസ്ലിമും വര്‍ഗീയ വാദമാണിതെന്നു പറയുകയുമില്ല.  ഇനി നിങ്ങളങ്ങനെയൊന്ന് പടച്ചുണ്ടാക്കിയാല്‍ അത് മുടി പടച്ചുണ്ടാക്കിയ പോലെ  തന്നെയാവുമെന്ന് കൂടി സാന്ദര്‍ഭികമായി ഓര്‍മിപ്പിക്കട്ടെ,


തിരഞ്ഞെടുപ്പ് വരുമ്പോള്‍  വല്യ സ്റ്റാര്‍ കളിച്ചു 'ജയിച്ചവരെ പിന്തുണച്ചു' എന്ന് പറഞ്ഞു ജനാധിപത്യത്തില്‍ കൈകടത്താന്‍ ശ്രമിക്കുന്ന കാന്തപുരത്തിന്റെ രോമത്തില്‍ കൈകടത്തിയാല്‍  അത് വര്‍ഗീയം ആണെന്ന് പറഞ്ഞാല്‍ അതിനുള്ള മറുപടിയും ഒരു "രോമം "തന്നെ ആണ്.

അതെ പിണറായി പറഞ്ഞത് തന്നെയാണ് ശരി.

"പ്രവാചകന്‍റെ മുടിയല്ല ആശയം പ്രചരിപ്പിക്കൂ "

സമൂഹത്തില്‍  നടക്കുന്ന അധാര്‍മികക്കെതിരെ വോട്ട് മാത്രം ലക്ഷ്യമാക്കി   "ക മ " എന്ന് മിണ്ടാതിരുന്ന രാഷ്ട്രീയ  മൂരാച്ചികളുടെ ഇടയില്‍ നിന്ന്  ആര്ജവുമുള്ള വാക്കുമായി വന്ന പിണറായിക്ക് അഭിവാദ്യങ്ങള്‍