പടച്ചോന്‍റെ ഓഫറും മൂത്രത്തിലെ കല്ലും

ഞാന്‍ കഴിഞ്ഞ വെക്കേഷന്‍ നാട്ടില്‍ പോയത് നോമ്പിനു മൂന്നു ദിവസം മുമ്പാണ്. എനിക്കറിയാവുന്ന അര അറബിയും മുറി ഇന്ഗ്ലീഷും മുഴുവന്‍ മലയാളവും കൂട്ടികുഴച്ചു ഒരു സാമ്പാര്‍ പരുവത്തില്‍  എന്‍റെ  സ്വന്തം അറബിയോട് ഞാനൊരു നൂറു വട്ടം പറഞ്ഞതാ ... എനിക്കിപ്പോള്‍ നാട്ടില്‍ പോകണ്ട  എന്‍റെ കയ്യില്‍ കാശില്ല എന്ന്."ഞാന്‍ തന്നെപ്പോലെ വായില്‍ സ്വര്‍ണകരണ്ടിയുമായി പിറന്നു വീണവനല്ല ചിരട്ടകൈലുമായി പ്രസവിച്ചു വീണതാ" എന്നൊക്കെ.. പക്ഷെ, എന്ത് ചെയ്യാന്‍...?
ശമ്പളം കുറച്ചും സ്നേഹം കൂടുതലും തരുന്ന എന്റെ സ്വന്തം മൊയലാളി   അല്‍ കല്‍ത്താനി  കുല്‍ത്താനി മൊയ്തീന്‍ ഒടുക്കത്തെ വാശിക്ക് മൂച്ച് കയറി അവന്റെ സ്വന്തം പോക്കറ്റില്‍ നിന്ന് കാശിറക്കി എന്നെ നാട്ടിലേക്ക് വീമാനം കയറ്റി.




 ടാങ്ക് ,നിഡോ ,തമര്‍,   ബദാം, പിസ്ത മുതലായ ഭക്ഷ്യ മൂലാധികളും ,,,സോപ്പ്‌ ചീപ് ,പാരച്യൂട്ടു ,ഏരിയല്‍ ,ഫയറി ,തുടങ്ങിയ അടുക്കള സാധന സാമഗ്രികളും ,എക്കൊലാക്ക് കമ്പനി മൈടു ഫോര്‍ ഗല്‍ഫന്‍സിനു മാത്രം ഇറക്കിയ പന്ത്രണ്ട്കിലോ ബ്രൌണ്‍ പെട്ടിയും തൂക്കി ,പൊക്കിളിന്റെ മേലെ ബലൂണ് പോലത്തെ അംബ്രല്ലവയറില്‍ ഇന്‍സൈഡും ചെയ്തു മദ്രാസ് പപ്പടം വലിപ്പത്തില്‍ പൊട്ടും ,കഷായത്തിന്റെ കളറും ഒത്തു ചേര്‍ന്ന എയറിന്ത്യ വാനമ്പാടി അമ്മച്ചിയുടെ അനുഗ്രഹവും വാങ്ങി നാട്ടില്‍ ലാന്‍റ് ചെയ്ത മുതല്‍ തുടങ്ങി ഓരോമാലാമത്തുകള്‍ .


പടച്ചോന്റെ സ്വന്തം ദുനിയാവ് എന്ന് മാലോകര്‍ മൊത്തവും വള്ളി പൊട്ടിയ ട്രൌസറിടുന്ന സായിപ്പും, പിന്നെ വിനീതനും അടക്കം സകല  ആത്മി അസാന്മാരും പറയുന്ന  മഞ്ഞു പെയ്യുന്ന മനംകുളിരുന്ന മാമ്പൂ പൂക്കുന്ന  മരതക നാട് . ഈ ഒരു നാടിനെ കുറിച്ച് ഇക്കരെ നിന്നപ്പോള്‍ എന്തൊക്കയാണ് വാഴ്ത്തി  പാടിയിരിക്കുന്നത്.  ഹോ....!!  ഓര്‍ക്കുമ്പോള്‍ കുളിര് കോരുന്നു എയര്‍ പോര്ട്ടിലേക്ക് കാലെടുത്തു വെച്ചതും  കാക്കി ഇട്ടതും ഇടാത്തതുമായ ഏമാന്‍മാരുടെ കുത്സിത ലക്ഷ്യത്തോടെയുള്ള ചോദ്യങ്ങളും  ചെക്കിങ്ങും എല്ലാം കണ്ടപ്പോള്‍ 
 ബ്ലഡില്ലാത്ത എന്റെ ബോഡിയിലെ നീര് തിളക്കാന്‍ തുടങ്ങി. ഇവന്‍മാരെന്താ മലയാളം മാത്രമറിയുന്ന എന്നോട് പാകിസ്താന്‍ പൌരനോട് പെരുമാറുന്ന പോലെ പെരുമാറുന്നത് എന്നു തുടങ്ങി ഒരു നൂറു കൂട്ടം ചിന്തകള്‍ എന്റെ  കൊമ്പില്ലാത്ത തലയില്‍ ഇന്ത്യ ശൂന്യാകാശത്തേക്ക് വിട്ട റോക്കെറ്റ് ലക്‌ഷ്യം തെറ്റി കറങ്ങുന്നത് പോലെ കറങ്ങി കൊണ്ടിരുന്നു .

മലയാളിയുടെ സാംസ്കാരിക സമ്പന്നതയെ കുറിച്ച് എത്രയെത്ര പറഞ്ഞവനാ ഞാന്‍ 

എന്നിട്ടും  എന്റെ നാട്ടിലെ നിയമപാലകര്‍ക്ക് മാത്രമെന്താ  ഇപ്പോളും സംസ്ക്കാരം ഇല്ലാത്തതു..?  അതിനൊക്കെ എന്റെ അല്‍ കുല്‍ത്ത്  മൊയലാളി മോയിദീന്റെ നാട്ടിലെ പോലീസ്  ആദ്യം തന്നെ കാണുമ്പോള്‍  അപരാധി ആണോ? നിരപരാധി ആണോ? എന്നൊക്കെ തിരിച്ചറിയുന്നതിനു മുമ്പ്  കൈതന്ന്  പടച്ചോന്റെ അനുഗ്രഹം നിങ്ങളെ മേല്‍ സദാ വര്‍ഷിക്കട്ടെ എന്നു  അഭിസംബോധന ചെയ്യുന്നത് കാണുമ്പോള്‍  കഷ്ട്ട കാലത്തിനു വല്ലതെറ്റും ചെയ്തിട്ടുണ്ടെങ്കില്‍  തന്നെ ചുമ്മാ കയറി അങ്ങ് സമ്മതിക്കും......! ആ സ്ഥാനത്ത്  മുജ്ജന്മത്തില്‍  എന്റെ ആറാം വാരിക്കിട്ടു  പിച്ചാത്തി താഴ്ത്തി യമലോകത്തേക്ക് യാത്രയപ്പ് തന്നവനല്ലേ.....
 മുന്നില്‍ നില്‍ക്കുന്നത് എന്ന ഭാവത്തോടെ നില്‍ക്കുന്ന ഈ ഫാരത പുത്രനോക്കെ   എവിടുത്തെ ജനമൈത്രിയാ................?
  എന്തോരോ................?
  എന്തോ.......................?
 വരാനുള്ളത്  റണ്‍വേയില്‍ അല്ല മെറ്റല്‍ ടിറ്റക്റ്റരില്‍ വരെ തങ്ങില്ല എന്നാണല്ലോ പുതുമൊഴി! ഇതാ വരുന്നു അടുത്ത കുരിശ്.  കാല്‍സറായിയും  അണിഞ്ഞു തൊപ്പിയും വെച്ച് കുപ്പിയുമടിച്ച് വരുന്ന ആ തിരുരൂപം മുന്നില്‍ കണ്ടതും ജനിച്ചിട്ട്‌  ഇന്ന് വരെ വിളിക്കാത്ത പടച്ചോന്‍മാരെ സകലതിനെയും ഒരാവര്‍ത്തി വിളിച്ചു.  ഇനി ഈ  പഹയന്റെ ആഗമനോദ്ദേശം  എന്താണാവോ .....?  


പുള്ളിക്കാരന് വേണ്ടത് മറ്റവനാണ്.......  വിദേശത്ത് പോയി വരുന്ന സ്വദേശികള്‍  കൊണ്ട് വരുന്ന വിദേശിയെ !
  ഹാവൂ......!!

   തൊപ്പിയും കുപ്പായവും കണ്ടാല്‍  ആള് മാന്യനാണെങ്കിലും  സ്വഭാവം കൂതറയാ ..... കണ്ടവന്‍ കൊണ്ടുവരുന്ന കുപ്പിക്ക് കൈ നീട്ടുന്ന തെണ്ടി ഇവനെയൊക്കെ ആരെടാ  ഈ പണിക്കേല്‍പ്പിച്ചത്  എന്നു  എട്ടു ദിക്കും പൊട്ടുമാറുച്ചത്തില്‍ ചോദിച്ചവന്റെ   നെഞ്ചിന്‍ കൂടിനിട്ടു ഒന്ന് പൊട്ടിക്കാന്‍  തോന്നായിഅല്ല .പിന്നെ വെറുതെ എന്തിനാ നല്ല തല്ലു  ചോദിച്ചു വാങ്ങുന്നത് വീട്ടില്‍ നിന്ന് പെണ്ണുമ്പിള്ള ആവശ്യത്തിനു  തരുന്നത്   കൊണ്ടും എയര്‍ പോര്‍ട്ടിനു പുറത്ത് എന്നെ സ്വീകരിക്കാന്‍ വെമ്പി നില്‍ക്കുന്ന സ്വന്തം കെട്ടിയോളും ഞാന്‍ കണ്ടതും കാണാത്തതുമായ  ചക്കര  തത്തമ്മ തുടങ്ങിയ സന്താന സൌഭാഗ്യ കണ്മണികള്‍  കാത്തു നില്‍ക്കുന്നത് കൊണ്ടും ഒരു കേരളീയനാണ് എന്ന അഹങ്കാരം വെടിഞ്ഞു  പഞ്ച പാവമായി ആ യമഗണ്ടന്‍റെ  ചോദ്യങ്ങള്‍ക്ക് മുമ്പില്‍ താണ് കൂണ്  ഉത്തരം നല്‍കി കൊണ്ടിരുന്നു.

 ഞാന്‍ വരുന്നത്  അങ്ങ് ദുഫായീന്ന് അല്ല  ബദ്രീങ്ങളെ നാട്ടില്‍ നിന്നാണ് അവിടെ നിങ്ങള്‍ കുടിക്കുന്ന സര്‍വത്തും വെള്ളം എനിക്കും എന്റെ സ്വന്തം അല്‍ കുല്‍ത്ത്മൊയ്തീന്റെ  നാട്ടുക്കാര്‍ക്കും  ഹറാമാണെന്നും  അത് കൊണ്ട് എന്റെ കയ്യില്‍ അതില്ല എന്‍റെ പോന്നു "സാറേ" .......................... എന്നക്ഷരം തെറ്റിക്കാതെ പറഞ്ഞിട്ടും ഉള്‍കൊള്ളാതെ  ആ "ഫന്ന ഫാരത ഫൌരന്‍" അവന്‍ എന്റെ ആമാട പെട്ടി തുറന്ന് കണ്ടാലേ  കലിപ്പടങ്ങൂ എന്ന   ഒടുക്കത്തെ വാശി  കണ്ടതും  കൊമ്പും വമ്പും  നടയിലൊതുക്കി   ക്ഷമയുടെ നെല്ലിപലകയില്‍ നിന്ന എന്റെ സകല കണ്ട്രോളും തെറിച്ചു.
 "ഗതി കെട്ടാല്‍ ബ്ലോഗ്ഗര്‍ കമെന്ടല്ല ഫോളോ വരെ ചെയ്യുമെന്ന്" പറഞ്ഞപോലെ ആപ്പീസര്‍ ഹമുക്ക് ചാടിയതിലും പതിന്മടങ്ങ് ശക്തിയില്‍ ഞാന്‍ ഒരു ലോങ്ങ് ജമ്പ് ചാട്ടം ചാടി സുരേഷ് ഗോപി സ്റ്റൈലില്‍  നിനക്ക് ഞാന്‍ എന്റെ ആമാടപെട്ടിയല്ല അണ്ട കടാഹം വരെ കാണിച്ചു തരാടാ  സരിഗമ പധനിസ സാറേ ... എന്നു പറഞ്ഞ് കേട്ട അവനു പിന്നെ  കുപ്പി പോയിട്ട്  കുപ്പിയുടെ അടപ്പ്‌ പോലും വേണ്ട  ആട് കിടന്നിടത്ത് പൂട പോലും കാണുന്നില്ല.

 ഒരു യുദ്ധം ജയിച്ച ഭാവത്തില്‍ പുറത്തിറങ്ങി  അരുമ സന്താന സംഗമം ആസന്നമായ നിമിഷങ്ങള്‍ മനസിനുള്ളില്‍ പൊട്ടി വിടരുന്ന പലവിധ   വികാരങ്ങള്‍  ഗള്‍ഫിലേക്ക് വണ്ടി കേറുമ്പോള്‍ പൊന്നുമ്മ തന്ന ചക്കരമോള്‍ എന്നെ മറന്നു കാണുമോ?  ഞാന്‍ കാണാത്ത എന്നെ കാണാത്ത തത്തമ്മ !എന്‍റെ തത്തമ്മ കുട്ടി എന്ത് പെര്‍ഫോമന്‍സ്‌ ആവും  കാണിക്കുക ? തുടങ്ങി അകതാരില്‍ ഒരായിരം ആകാംഷകളുടെ പൂത്തിരി കത്തി തീരുന്നതിനു മുമ്പതാ ഓടിച്ചാടി സന്തോഷ നിമിഷ പുളക ഹര്‍ഷത്താല്‍ വന്നു എന്‍റെ കൈകളിലേക്ക് പാഞ്ഞു കയറി ന്റെ ചക്കരമോള്‍  ഫാഗ്യം.! മോളെന്നെ മറന്നില്ല. അതുകഴിഞ്ഞു ഞാന്‍ കാണാത്ത തത്ത കുട്ടിയെ വാരി പുണരാന്‍ കൈ നീട്ടിയതും   കൈക്കൊരു തട്ടും തന്ന് ഏതാ  ഈ കോപ്പന്‍ എന്ന ഭാവത്തില്‍ മുഖം ഒരുവെട്ടിക്കല്‍.  ന്റെ  പോന്നു മോളെ... ഇതു കോപ്പന്‍ അല്ല ബാപ്പയാണെന്ന് പറഞ്ഞിട്ട് അവള്‍ക്കുണ്ടോ?  വല്ല കുലുക്കവും  വിത്ത് ഗുണം പത്തു ഗുണം നാല് ദിവസം പെടാ പാട് പെട്ടു ഞാനും വീട്ടുകാരും അവളെ ക്കൊണ്ട് അവളെ ബാപ്പയാണ് ഞാനെന്നു മനസിലാക്കിക്കാന്‍  ഒരു പ്രാവാസി അച്ഛന്റെ ഗതികേടേ......... അല്ലാതെന്ത്  പറയാന്‍ ..?   സ്വന്തം മോള്‍ക്ക് അച്ഛനെയും അച്ഛനെ മോള്‍ക്കും പരിചയപ്പെടുത്തേണ്ടി വരുന്ന ഇന്‍ ട്രോഡക്ഷന്‍ റൌണ്ട്..!!  ചുമ്മാതല്ല  സഹമുറിയന്‍ അന്ത്രുമാന്‍ ഇടയ്ക്കിടെ പറയാറ് ഈ ഗള്‍ഫ്‌ കണ്ടു പിടിച്ചവനെ കിട്ടിയാല്‍ തൂക്കി കൊല്ലണമെന്ന്.

അങ്ങിനെ പറയത്തക്ക കുഴപ്പങ്ങള്‍ ഒന്നുമില്ലാതെ മൂന്നു നാല് ദിവസം ഉമ്മച്ചിയുടെ 'നൈസ് പത്തിരിയും  ഇറച്ചി കറിയും 'ഇടക്ക് അമ്മായി അമ്മയുടെ പൊരിച്ച കോഴിയും പിന്നെ അല്ലറ ചില്ലറ സല്‍ക്കാരങ്ങളും  എല്ലാം ആയപ്പോള്‍ ഉണക്ക ഖുബ്ബൂസും തൈരും തിന്നു മൂര്‍ച്ച പോയ നാവോക്കെ വീണ്ടും ഉശാറായെന്ന് മാത്രമല്ല  നാട്ടില്‍  കൂലി പണി എടുത്തു നടന്ന സമയത്ത് എന്നെ മൈന്‍ഡ് ചെയ്യാതിരുന്ന സകല ചൂക്ളികളും എന്നെ പരിഗണിക്കുന്നു .

പ്രവാസം കൊണ്ടുള്ള ഒരു ഗുണം  അതാണ്‌. അന്നുവരെ നമ്മളെ കാണുമ്പോള്‍ മുഖം കറുപ്പിച്ചവനൊക്കെ നമ്മളെ കാണുമ്പോള്‍ മുഖം വെളുപ്പിക്കും  അത് കണ്ടെങ്ങാനും മനസലിഞ്ഞാല്‍ കുടുംബം വെളുക്കും  ഹല്ല പിന്നെ....!

അങ്ങിനെ ഉണ്ടുറങ്ങി സ്വസ്ത സമാധാന സ്വരൂപനായി വസിക്കവേ അതാ വുന്നു അടിവയറ്റിനൊരു വേദന ! വേദന എന്നു പറഞ്ഞാല്‍ പ്രസവവേദനക്ക് തുല്യം.  വേദന കണ്ടതും ഉമ്മച്ചിയുടെ മുറി വൈദ്യ ചികിത്സയുടെ ഭാഗമായി  കൊമ്പന്‍ ജാതി ഗോരോസന്‍ ജാതി കീഴ്ജാതി മേല്‍ജാതി തുടങ്ങിയ ഗുളികകളും തൊടിയില്‍ നിന്ന് പറിച്ചാല്‍ കിട്ടാവുന്ന  പച്ചിലകളും അരച്ചും ഉരുട്ടിയും കഴിച്ചിട്ടും ഒരു പരിഹാരവുമില്ല . നേരെ ഹോസ്പിറ്റലിലേക്ക് പരിവാരസമേതം ഉമ്മച്ചിയുടെ ഭാഷ കടമെടുത്ത് പറഞ്ഞാല്‍ 'ലാക്ക്ട്രന്‍മാര്‍' തിരിച്ചും മറിച്ചും കിടത്തി അവില്‍ മില്‍ക്ക് ഉണ്ടാക്കാനുള്ള മൈസൂര്‍ പഴം ഞക്കി ഉടക്കുന്നത് പോലെ നാല് ഞെക്കലും പിഴിയലും മൂന്നു മാസത്തെ ലീവിന് നാട്ടില്‍ പോയ  എന്റെ ആറു മാസത്തെ ആരോഗ്യം ഇതാ കിടക്കണ് .!  ആറുമാസത്തെ ഊര്‍ജ്ജം പോയത് പോട്ടെ ..  വല്ലകാരണവും  ഈ രണ്ടു കൊപ്പന്സിനും കണ്ടെത്താനായോ അതുമില്ല . നീട്ടി വലിച്ചൊരു എഴുത്ത്. സ്കാനിങ്ങ്  ചെയ്യണമത്രേ..!!   ഒരു ദിവസത്തെ സാലറിയും വയറ്റത്ത് ജെല്ലുമായി  കിഡ്നിക്കുള്ളില്‍ കല്ലാണെന്ന സത്യവും പുറത്തു വന്നു .

കിഡ്നി കല്ലാണെന്ന് കേട്ടതും ഞാന്‍ താലി കെട്ടാതെ നിക്കാഹു ചെയ്തു കൊണ്ട് വന്ന  പെമ്പ്രന്നോരു ചെവിയില്‍  തന്ത്രത്തില്‍  ഒരു മന്ത്രം ഞാന്‍ പണ്ടേ പറഞ്ഞതല്ലേ മനുഷ്യാ നിങ്ങളെ ഹൃദയം കല്ലാണെന്ന്.
ന്റെ റബ്ബില്‍ ആലമീനായ തമ്പുരാനേ .......   "എന്റെ കിഡ്നിയില്‍ കല്ലിട്ട നേരത്ത് ഈ പോത്തിന്റെ  തലയില്‍ കുറച്ചു അന്തത്തിന്‍ വിത്തിട്ടിരുന്നെങ്കില്‍ ന്റെ   കുടുംബം രക്ഷപ്പെട്ടേനെ"

ആത്മഗതം  ലേബലില്‍ തട്ടിവിട്ടു കഴിഞ്ഞപ്പോഴേക്കും  പരിവാര ജാഗരൂഗ സമൂഹം ചികിത്സാ പ്രതിവിധികള്‍  നിര്‍ണയിക്കല്‍  തുടങ്ങി  കഴിഞ്ഞു.  വയറ്റത്ത് തടവി ഞെക്കി പിഴിഞ്ഞ ലാക്കട്ടരന്മാര്‍ ഓപറേഷന്‍ എന്ന ക്രിയ വിക്രിയത്തിലൂടെ ഈ കല്ല്‌ അണ്‍ ലോഡ് ചെയ്യാന്‍ നിര്‍ദേശിച്ചതിനെ ഖണ്ഡിച്ചു കൊണ്ട് മറ്റു മാര്‍ഗങ്ങള്‍  തിരയുകയാണ്   നാട്ടു വൈദ്യത്തിലൂടെ ഈ സാധനത്തെ ഉണക്കി പൊടിച്ചു ഇല്ലാതാക്കാം  എന്നുള്ള ആശയവുമായി  സ്വന്തം കൂട്ടുകാരന്‍  'മുട്ടിറുപ്പ്യ ഉമ്മര്‍ കൊണ്ട് വന്ന  'പ്രമേയത്തെ' എല്ലാവരും അംഗീകരിച്ചു .

അങ്ങനെ തൊടുപുഴ കാളിയാരിനടുത്തുള്ള ഒരു സാധാരണ വീട്ടമ്മ ആയ ഒരമ്മച്ചിയെയാണ് എന്റെ  കല്ല്‌ ഖനനം ചെയ്യാന്‍ തെരഞ്ഞെടുത്ത വൈദ്യ.ന്‍   ഇതിനു മുമ്പ്  എന്റെ നാട്ടിലെ പല ഗഡികളുടെയും കല്ല്‌ കളഞ്ഞതവരാണ്  നാട്ടുകാര്‍ക്കാണേല്‍  അവരെ കുറിച്ച് വല്യ അഭിപ്രയവുമാണ് . അങ്ങിനെ അവരെ പോയി കണ്ടു മരുന്ന് കുടിക്കാന്‍ തന്നെ തീരുമാനിച്ചു ! അവര് തരുന്ന മരുന്നിന്റെ  പേര് കേട്ട്  ലഡു  പൊട്ടി ബോറടിച്ച  മനസ്സില്‍ ഒരു  'കുംബ്ലംഗ'  പൊട്ടി..!!

ഒരു തരം പൌഡര്‍ മൂന്നു പൊതികളിലായി പൊതിഞ്ഞു കയ്യില്‍ വെച്ച് തന്നിട്ട് പറഞ്ഞു  മൂന്നു ദിവസം തുടര്‍ച്ചേ    ഫ്രഷ്‌ തെങ്ങിന്‍ കള്ളിന്‍ ഈ മരുന്ന് ചേര്‍ത്ത്  ഇരുപത്തിനാല്  മണിക്കൂര്‍ഫ്രിഡ്ജില്‍ വെച്ച്  വെറുംവയറ്റില്‍ കുടിക്കാന്‍...  പോരെ പുകില് ..?

കള്ള്  നേരത്തോടു നേരം കൂടിയാല്‍ അതില്‍ നിന്ന് വമിക്കുന്ന ദുര്‍ഗന്ധം  (ഏതായാലും കൊച്ചി കോര്‍പ്പറേഷനോളമില്ല) കൂടെ മരുന്നിന്‍റെ ഒരു പ്രത്യേക രുചിയും എല്ലാം കൂടി സഹിച്ചു പുണ്ണ്യങ്ങളുടെ പൂക്കാലമായ റംസാനില്‍ വീട്ടില്‍ കുടുംബാംഗങ്ങളുടെ ഒക്കെ നടുവില്‍ വെച്ച്  ഒരു കള്ള് കുടി 

പടച്ച തമ്പുരാന്‍ മാലോകര്‍ക്ക്  സ്പെഷ്യല്‍ ഓഫര്‍ പ്രഖ്യാപിച്ച കാലം ഒന്നെടുത്താല്‍  എഴുപതിനായിരം ഫ്രീ   ഈ മാസത്തില്‍ ഇങ്ങനെ

സന്ദര്‍ഭ സാഹചര്യ സമ്മര്‍ദ്ദത്താല്‍ ചെയ്തു  പോയ ഈ തെറ്റിന് ദൈവത്തോട്  മാപ്പപേക്ഷിച്ചു കൊണ്ട് . ശരീരത്തിന് യാതൊരു കേടും വരുത്താതെ  കിഡ്നിയിലെ കല്ലിനെ പുറത്തെടുത്ത ചേച്ചിക്ക് നന്ദി  പറഞ്ഞു  കൊണ്ട് മാലോകര്‍ക്ക് മുന്നില്‍ സമര്‍പ്പിക്കട്ടെ  ഈ കുറിപ്പടി   ...!!!